FATF, Changed realities & Pakistan (ایف اے ٹی ایف، بدلدا ویلہ اتے پاکستان)

 

FATF, Changed realities & Pakistan 

(ایف اے ٹی ایف، بدلدا ویلہ اتے پاکستان)

 سال 1989 وچ چین امریکہ مل کے ایف اے ٹی ایف بنایا پر سرد جنگ وچ مزے لین والی ریاستاں اتے جتھے بندیاں سنے مالیاتی اداریاں نوں سمجھ نہ آئی کہ ویلہ بدل رہیا ہے،2008، 2012 تے 2018 وچ سانوں کیوں ''گرے لسٹ'' وچ رکھیا، قوم نوں کون ''سچ'' دسے گا؟کس پاکستان نوں  مروان دے جتن کیتے تے کیہڑے پاکستانیاں ملک نوں بچاون دا آہرکیتا کہ اس سب ۔بارے جاننا لوڑی دا ہے۔ 

قدیمی ریشمی رستے دے لانگیاں نال جڑیا جنوبی ایشیا مڈھ قدیم توں تجارتاں دا اک بھنڈار رکھدا سی پر نوآبادیاتی قبضیاں بعد ایس دا بوتھا وگاڑیا گیا اتے 19ویں صدی دے اخیر اتے 20ویں صدی دے شروع وچ ڈیورنڈ لین(1894) اتے میک ماہون لین(1914) بنا کے ایس خطے نوں تبت، چین، سنٹرل ایشیا توں وانجھا کر دتا گیا اتے  اپھیر 1947 وچ ریڈ کلف لین نے ایس نوں پکا کرن دا کم پورا کیتا۔ جے کانگرس کابینہ مشن نوں لت نہ کرائی ہوندی تاں ہوورے اسی ایس تریجی لین دے پاڑ توں بچ جاندے۔پئی ایہہ سب تے 1947 وچ ورثے وچ ملیا سی کہ ڈیورینڈ لین دا باڈر2670 کلو میٹر اتے میک ماہون لین دا باڈر890  کلو میٹر سی کہ ایڈے وڈے باڈراں دا برٹش ٹیچا ایہو سی کہ قدیمی ریشمی رستے یعنی سلک روٹ نوں توڑ بھن دتا جائے۔ چین نے تے 1962 وچ میک ماہون لین دا کم پورا کردتا تے ایس دا اعلان انہاں 1947 وچ کردتا سی جداں چینیاں برٹش انڈین سرکار نوں خط لکھیا سی کہ ساڈی تھاواں موڑ دیو۔ پاکستان بھارت بنن بعد سرد جنگی بندوبست وچ انہاں باڈراں تے سمگلنگ جاری رہی اتے عام تجارتان دے بندوبست نہ بنائے گئے۔ ایہہ اوہ نرم باڈر سن جتھوں سمگلر، انقلابی وی آندے جاندے سن تے پھیر ایہو رستے منی لانڈنگ تے دہشت گرداں لئی وی کھلے سن۔ پر 1989 وچ جو بندوبست نواں بننا شروع ہویا اوس وچ ایس سب دی گنجائشاں گھٹ ہون لگیاں۔ ایہو اوہ ویلہ سی جداں ایس بارے غور کرنا لوڑی دا سی۔ چیتے رہے کہ 1989 ہی اوہ سال ہے جداں پاکستانی وزیراعظم بی بی بے نظیر ہوراں ملک دے پردھاناں نوں کوک ماری سی کہ اوہ '' نواں سوشل کانٹریکٹ'' کرن کہ ہن پرانا چلے گا نہیں۔ پر اوس ویلے حمید گلی سوچ حاوی سی تے اوی کابل نوں 5واں صوبہ بناون دے سفنے ویکھدے سن۔ افغان جہاد دی برکتاں نال اک پاسے ہیروئن ایجاد ہو چکی سی تے دوجے پاسے یورپ تک سمگلنگ دا رستہ انہاں نوں سی آئی اے وکھا گئی سی۔ ایہہ اوہی گروہ سی جو ڈکٹیٹر ضیا الحق نوں جنیوا معاہدے تے دستخطی نہ ہون دا کہندا رہیا سی پر دستخطی ہون والے پاکستانی پردھان جاندے سن کہ جے ایہہ نہ کیتا جو چین، امریکہ، سویت یونین (روس) کہہ رہے جے تے پھیر ملک وی فارغ ہو سکدا ہے۔ 1989 تے 2022 وچ لنگے 33 سال گواہ جے کہ ساڈے کول لمیرا ویلہ سی کہ اسی ویلے دا نال آپ سب کجھ بدل دئیے پر کمائیاں کرن والے ایس پرانے سلسلیاں نوں ریاست دے وجود توں وی زیادہ اہمیتاں دیندے سن۔ 1990 دے دہاکے وچ آف شور کمپنیاں دا بھنڈار سامنے آیا تے ایس بعد منی لانڈنگ وچ وی وادھے ہونا لازم سی۔ پوری دنیا توں مالداراں ایس وچ غوطے لائے کہ ٹیکس دی وی چھوٹاں سن۔ نو گیارہ ویلے وی کجھ پردھاناں ایہہ دسیا کہ ویلہ ہے ہلے وی سرد جنگی بندوبستاں وچوں نکل آو پر جلال آباد تے کارگل تے مہماں کرن والے بدلدے ویلے نال بدلن لئی تیار نہیں سن۔ 

پئی سوچن والی گل ایہہ ہے کہ 2008 دے سال پاکستان نوں ایف اے ٹی ایف جداں ''گرے لسٹ'' وچ پایا تے اوس دی کیہہ وجہ سی؟ پاکستان کوئی اکلا ملک تے نہیں جس دا ناں گرے لسٹ وچ ہے، بس لسٹ دے باقی 22 ملکاں دے ناں ویکھو تے پتہ چل جائے گا کہ وجہ کیہہ ہے۔ ایہہ وی پتہ چل جائے گا کہ یو اے ای کیوں اسرائیل ول ڈلیا ہے۔ 

Albania, Barbados, Burkina Faso, Cambodia, Cayman Islands, Haiti, Jamaica, Jordan, Mali, Malta, Morocco, Myanmar, Nicaragua, Pakistan, Panama, Philippines, Senegal, South Sudan, Türkiye, and Uganda. For these countries, updated statements are provided below. The United Arab Emirates chose to defer reporting to focus on its efforts;

پاکستان نوں 2008 وچ ایف اے ٹی ایف  گرے لسٹ وچ پایا تے 2010 وچ جداں اسی کم ٹھیک کیتا تے کڈ دتا گیا۔ پھیر 2012 وچ اک وار پھیر ساڈا ناں مڑ آگیا گرے لسٹ وچ، پر کیوں؟ ایہہ سوال تے کسے پچھیا ہی نہیں ، نہ ساڈے ہشیار میڈیا نوں خیال آیا؟ 2015 تیک اسی اک وار پھیر گرے لسٹ توں نکل آئے پر 2018 وچ مڑ کیوں ساڈا ناں آیا، ایہہ اصل تے مڈھلے سوال جے جنہاں بارے کوئی گل نہیں  ہو رہی۔ ایہہ گل اپنی تھاں ٹھیک ہے کہ جی ایچ کیو وکھرا تے تگڑا سیل بنا کے ایس مسلہ تے کم کیتا کہ  گل بہوں خراب ہو رہی سی پر ایس وچ چار سال کیوں لگے؟گھٹ و گھٹ عمرانی سرکار ایس نوں  ٹھیک کرن دی بجائے کم ہر تھاں خراب کیتا۔ عمران خان کس تے آکھن تے ایہہ سب کردا رہیا؟ ایہہ سوال ہمش سب نوں تنگ کردا رہے گا۔ ہن وی اکتوبر تیک دا ویلہ اہم ہے کہ جو پرانی بندوبست دے مفادی جے اوہ کسے ہور شکل وچ ڈنگ مار سکدے جے کہ انہاں نوں ملک تے ریاست دی پروا نہیں ۔